بسم الله الرحمن الرحيم
عديت ساعة واحدة من ساعة إقلاع الطيارة من سويسرا ولسة 11 ساعة طيران لحد ما أوصل مطارالبرازيل
عديت ساعة واحدة من ساعة إقلاع الطيارة من سويسرا ولسة 11 ساعة طيران لحد ما أوصل مطارالبرازيل
يا رب عدي ال11 ساعة دول علي خير
طبعا أنا منكرش أني أنبهرت جدا بالمطار السويسري وخاصاً أن كله زجاج في زجاج
وال4 ساعات اللي أتفرجت فيهم على المطار والطيارات كانوا خرافه
بس اللي حازز في نفسيتي أوي أني مقدرتش أشتري شيكولانة سويسري كان منظرها يهبل
ولا الساعات والبرافنات والشنط الجلد
يلا بأه مش مشكلة ملحوقة لما أرجع مصر إن شاء الله أبقي أشتري من هناك
ما هو شارع سعد زغلول مليان والزنقة فيها كتير بس فين النفس
أيه ده في إيه هي الطيارة بتتهز كدة ليه وإيه النور الأحمر الللي بينور فوق راسي ده
يا رب أسترها معاي أنا غلبانة أه نربط الحزام وماله أربط ربطت الحزام وقلبي هيوقف من الخوف
وعماله أقول الشهادة وأيه الكرسي
ملييش غيرك يا رب وأنا بين السما والمحيط
أااااااااااااه بلاش سمكة قرش هتوجعني وهي بتعضني
ممكن درفيل أنا بحب الدرافيل ظريفة كدة ودمها خفيف
أرجع وأقول أنا اللي جبته لنفسي كان مالي أنا ومال السفر ما أنا كنت كويسة في بلدي
يووووووووووووووووووووووه
الحمد لله النور الأخضر نور أفك الحزام بأه
وأشوف التعليمات بتاعت الطيارة أنا أصلي ما كنتش فايقة في الأول
وخاصا بعد ماتش التفتيش اللي أخدته في المطار
يا سلام والله بأه كل ده لازم أعمله لو الطيارة هتقع
ماشي ماشي تحت الكرسي وفوق تمام كله تمام
يااااه ده تلاقي عدي ساعتين تلاتة
أيووووووووووووه ده يدوب عدي نص ساعة بس في فليم لرج والمطبات الهوائية دي
ما علينا أبص شوية من الشباك من نفسي بأه أشوف المحيط
وفتحت الشباك ألاقي الدنيا بره ضلمة كحل هشوف إيه
سرحت وأفتكرت اليوم إياه اليوم اللي ترتبت عليه كل حياتي حتى الأن
كنت واقفة في المطبخ بعمل الملوخية التركواز بتاعتي الجميلة
وجوزي داخل من باب الشقة وبيقولي أنه عاملي مفجأة
أه مش بحب المفجعات أنا
وبعدين فين المفجأه وأنت داخل كدة من غير بطيخة ولا كيس جوافة ولا حتى باكو لب
أتحفني قال إيه
أحنا مسافرين يا زوجتي العزيزة
بجد رايحيين جمصة مش معقول دي حاجة أريجنال خالص
لا يا زوجتي العزيزة أحنا مسافريين بره مصر
فين كولالامبور وساحل العاج قالي لا إيه جزر القمر
قال إيه رايحين البرازيل
ليه يا حبيبي ناقصيين بن
أروح البرازيل ليه أنا
أدي الله وأدي حكمته أستخرنا الله وتوكلنا عليه
وأديني دلوقتي في طريقي للبرازيل
ربنا يستر
يووووووووووووه هو كل شوية تترجي كدة والنور الأحمر لما أربط الحزام
وهي الناس مالها نايمة في سابع نومة كدة ولا هماهم مطبات هوائية ولا حتى مطبات صناعية
ولسة باقي من الزمن 9 ساعات
ربنا يستر ويعدوا على خير
يتبع
ليست هناك تعليقات:
إرسال تعليق