بسم الله الرحمن الرحيم
يا الله الناس نايمة وهات يا شخير
يا الله الناس نايمة وهات يا شخير
وأنا صاحية عاملة دماغ كابتشينو زي الفل.
اااااااااه والله يا أخ ما كنت أقومك ابداً من نومتك لولا الشديد القوي بأه أكسكويز مي
طبعا الأستاذ اللي جنبي صحي من نومة وبصلي وعايز يقول يا دي الليلة الكحلي وأنا كنت ناقصها دي كمان
وأنا نفسي أقوله أعملك إيه يعني بلاش أروح التواليت من نفسي يا أخي بقالي 20 ساعة مسافرة من اسكندرية لحد المحيط الأطلنطي
المهم عداني الله يستره وقمت أدور بأه على الحمام
وأمشي في الطرقة الطويلة اللي بين الكراسي إيه ده كول دي طيارة
دي ولا شارع أيوقير الساعة 2 الظهر
10 كراسي بعرض الطيارة وبالطول بأه ماتعدش المهم وصلت لأول تواليت لقيته مشغول قمت مشيت تاني
لحد ما وصلت لأخر الطيارة عند المطبخ الحمد لله وصلت وده في حد ذاته إنتصار
المهم أنا إيدي مليانة صابون ومش عارفة أفتح الحنفية وعايزة أتوضا
أعمل إيه أعمل إيه
أخبط الحنفية وأضربها يا ستي يا حبيتي هاتي شوية مية
وبعدين بأه
يااااااااه الحمد لله لوحدها ومين غير أي مؤثرات خارجية نزلت مية
أتاري بأه في خلية ضوئية لما أيدي تعدي من قدامها المية تنزل من الحنفية
يا سلام ده اعلم نور يا ولاد
بس دي تكنولوبيا جديدة عليا أنا كان أخري الحنفية اللي باللمس شوفتها في مكتبة إسكندرية
أنما بأه خلايا ضوية وكهربا وماس كلام من ده لسة ما وصلش عندنا
قولت أطل على المطبخ شوية
ما أنتوا عارفين بأه المطبخ ده هوايه من أيام الملوخية التركواز بتاعتي
والرز بلين اللي عمره ما طلع شبة اللي قبله أبدا نوع من التغيير والتجديد
المهم دخلت المطبخ وشربت كوباية عسير برتقال معجبنيش قلت أجرب عسير الطماطم برده ماجاش على مزاجي سألت على عصير قصب
قالوا منعرفوش
قلت لهم فاتكوا نص عمركوا
وأخدت معاي زجاجة مية من أم بلاش بأه وبسكوت
وقلت أرجع الكرسي بتاعي قبل الراجل اللي قاعد على الكرسي اللي جنبي ما يطمع فيه
وأخذت طريقي الي العودة
وأنا ماشية في أمان الله الطيارة أترجت تاني
وقته ده المهم أنا أحتست طبعا بزجاجة المية والبسكوت وضربت أجدع لخمة
ومش عارفة أعمل إيه اااااااااه يا ربي يعني ممكن الطيارة تقع قبل ما أشرب المية
المهم لاقيت إيد شدتني من الطرقة ورزعتني علي كرسي وربطت الحزام على بصيت لاقيتها مضيفة حلوة كدة
وقالت لي في مطبات هوائية دلوقتي ما يعنفش تمشي في ممرات الطيارة
كان نفسي أقولها ربنا يكرمك ده انتي أنقذتي حياتي وأنقذتي زجاجة المية
مش عارفة أشكرك أزاي
الحمد لله المطبات الهوائية وقفت ممكن بأه يا ختي أروح الكرسي بتاعي ليتاخد في الزحمة دي
قمت بأه لاقيت الناس بتتمشي في الطيارة اللي بالبجامة واللي بالترنج واللي ماشي حافي
هيصة بأه والدنيا ضلمة ومحدش شايف حاجة
والحمد لله وصلت الكرسي بتاعي أنا وزجاجة المية الثمينة
وقعدت أفكر هعمل إيه بأه علشان أنام ماهو مش معقول يعني لسة بدري أوي
وأنا لازم انام شوية
أقولكم بأه عملت إيه علشان أنام
يتبع
ليست هناك تعليقات:
إرسال تعليق