فانوسي صنع في البرازيل

السلام عليكم ورحمة الله وبركاته

ورمضان كريم

نظرا لأن السوق الصيني هنا ماعندهمش فوانييس رمضان

وكمان بالي اسبوع بدور على النت وعلمت سيرش نفضت فيه النت كله حته حته علشان طريقة سهلة لعمل فانوس رمضان ويكون فانوس كدة كبير ويملي العين وبصراحة بعد البحث والتنقيب لم اجد اي نتائج

علشان كدة فكرت كتير كتير وقررت اني اعمل الفانوس بنفسي

أول حاجة عملتها حضرت الأدوات كرتونة كبيرة ومقص ومسطرة وقلم رصاص واسكوتش وصمغ قوي وورق هديا واقلام ملونة

بعد كدة جبت الكرتونة وفتحتها بالمنظر ده

وبالمسطرة ورسمة رسمة الفانوس على الكرتون عملت القاعدة عرض 25 سم والقمة 30 سم وقعدت بالقطر وباه عندي 4 قطع متساوية بالشكل التالي

بعد كدة تم لصق ال 4 مع بعض وبكدة بأه عندي قاعدة الفانوس بالشكل ده

نيجي بأه لقمة الفانوس الهرمية بالكرتون نقص 4 مثلثات ونلصقهم ببعض بالشكل التالي

نثبت القمة الهرمية على قاعدة الفانوس وهيكون عندنا فانوس بالشكل ده

نغلف الفانوس بورق الهديا بالشكل التالي

بواقي الكرتون بعد قص الفانوس تم قصها على اشكال نجوم وهلال وتلوينها تم تعليق النجوم في حواف الفانوس

وبأه عندي في الأخر فانوس كبير وده الشكل النهائي

قوللي بأه رايكوا ايه في فانوسي؟؟
وكل عام وانتم بخير

طرائف مصرية مطحونة في البرازيل المجنونة 3

ياااه كل الي سألته قبل ما أسافر قالي هتلاقي أسم المطار اللي هتنزلي فيه مكتوب على لوحة الأعلانات في المطار ومنها هتعرفي رقم الجيت اللي هتركبي منه الطيارة

وأنا قاعدة قدام لوحة الأعلانات وأسم ساوباولو ما نورش لحد الآن وما ظهر رقم الجيت اللي هركب منه أعمل إيه دلوقتي

توكلت على الله وروحت سألت موظفة الاستعلامات اللي موجوده في صالة الترانزيت

قالت لي أصلا الطيارة اللي أنا هركبها رايحة كلومبيا وهتوقف ترانزيت في ساوباولو المفروض أن ده المطار اللي أنا هنزل فيه

قلت لنفسي لا يا شيخة كل ده وأنا معرفش

ربنا يستر

المهم قالت لي الباب رقم E64

قلت لها ماله نزلت تاني وركبت المترو إيها الي من غير سواق

بس المرة دي روحت على مكان تاني اللي بتتطلع منه الطيارات لأمريكا الشمالية والجنوبية والتينية والاتينية

وصلت لمكان التفتيش ووقفت في الطابور

لحد ما وصلت لموظف التفتيش وحطيت شنطتي وعديت الحمد لله

ولاقيت موظفة لطيفة جدا طلعتني من وسط الطابور كله قدام الناس كلها

ودخلتني حجرة لطيفة جدا زيها وفتشتني وأخذت حذائي

حتى الحذاء طمعانة في شوفوا الناس

المهم الحمد لله بعد ربع ساعة من التفتيش اللطيف واللي ماقدرش أقول عليها غير كلمة لطيف

المهم أن الحمد لله ما طلعش معاي غير شوية رشاشات على حبة قنابل على كام دبابة كدة لزوم السفر يعني مش أكتر

الدنيا ساقعة جدا والبلاط زي الثلج ودرجة الحرارة في سويسرا 9 درجة مئوية وأنا واقفة حافية والهانم طبعا طماعنة في الحذاء وأخدته مني ومعرفش راحت بي على فين

والناس طبعا واقفة تتفرج على وأكيد بيقولوا مين المسكينة دي اللي معندهاش حذاء

الحمد لله حذائي جه

لبست الحذاء بعد ما رجلي كانت أتجمدت ووصلت لباب الطيارة الحمد لله

وأنا ارتعش من البرد بعد ما أخدوا الجاكت بتاعي وأعطوه لي على باب الطيارة

الساعة الآن 12 بعد منتصف الليل دخلت الطيارة وانا أحمد الله عز وجل أن موضوع التفتيش ده عدي على خير

الحمد لله عديت على خير والله أنا ربنا بيحبني أنهم ما أخدوش بالهم من الصاروخ اللي معاي المحفظة

وأبص كدة أمامي أجد زجاج في زجاج وبصيت على مرمي البصر لاقيت وشك الطيارة بس أمال فين بأه بقيت الطيارة على كدة

مش مهم أنا دخلت من باب الطيارة وأدور بأه على الكرسي بتاعي الحمد لله لاقيت الكرسي بتاعي جنب الشباك بس أساساً الدنيا بره ضلمة كحل هشوف إيه مش عارفه مش مشكلة المهم أني جنب الشباك وده في حد ذاته شئ رائع

جلست في مكاني وبدأت محركات الطيارة في الدوران وأنا أنطر من الشباك لأجد طيارة تانية أمام الطيارة بتاعتي

الطيارتين ماشيين ورا بعض في ممرات المطار ولا كأنهم عربيتين فولكس بيجروا ورا بعض على كورنيش اسكندرية

والطيارة اللي قدام تحود يمين طيارتنا تحود يمين وبعدين شوفت الطيارة الي قدام بتقلع وتوكلت على الله وطارت

وبعدها على الطيارة بتاعتي أقلعت في أمان الله وأنا أردد الشهادتين واقرأ القرآن لازم أقول الشهادة مين عارف هيحصل إيه فوق

ما أنا أصلي راكبة عابرة القارات مش أي حاجة وما أن أستقرت الطيارة في الجو وطلعت فوق السحاب في ثواني

وبقيت على بعد الآف الكيلو مترات حتي شعرت برعشة وسقعت وأطرافي أزرقت والمضيفة تجيب في بطاطين

وانا أقولهم سقعانة أتصرفوااااااااااااا

والحمد لله بعد شوية أدفيت
بألنا ساعة في الجو مش عارفة ال12 ساعة طيران دول هستحملهم أزاي ده يدوب عدي ساعة

بس يا ياستر على الملل مفيش دقيقة على كلامي ولاقيت النور أطفي والمضيفة ماشية في الطيارة sleeping sleeping

إيه يا جماعة في إيه مين اللي نايم ولا مين اللي هينام

المهم هي ثانية واحدة ولاقيت الناس كلها اللي في الطيارة عملوا سينفونية عزف جماعي وناموا

مع تشغيل إسطوانة شخر يا عم شخر محدش واخد منها حاجة
وأنا طبعا شاربه كوباية كباشتينو 7 متر ودماغي مصفحة

ومش عايزة أنامواضح أنها ليلة طويلة

وجراب الحاوي لسة مليان

طرائف مصرية مطحونة في البرازيل المجنونة 2

بسم الله الرحمن الرحيم

أقتربت الطيارة من مطار الترانزيت بسويسرا

بصيت من شباك الطيارة وعلى الرغم من أننا كنا في منتصف شهر أكتوبر إلا أني شوفت الثلج مغطي قمم الجبال السويسرية زي الجيلاتي

وبدأت الطيارة في ممرحلة الهبوط وقلبي يدعو الله بأن تهبط بالسلامة وما يحصلش حاجة من اللي كنت بشوفهم في الأفلام

يااااااااااااااااااااااااااااااااااااااااااااااااا ااااااه

الحمد لله الطيارة وقفت مش عارفة أنا اللي عملته في نفسي بس كان مالي أنا ومال السفر ووجع القلب ده

خرجت من الطيارة وسألت على صالة الترانزيت

قالوا لي لازم تركبي المترو وتروحي بيه على صالة الترانزيت

قلت لنفسي مترو ليه هو أنا رايحة رمسيس

المهم أدور يا جماعة على محطة المترو جوة المطار مفيش لحد مالاقيت شوية ناس كدة متحمعين أمام باب

روحت بأبتسامة لطيفة يا عم أنا عايزة أركب المترو اللي جوة المطار علشان أروح صالة الترانزيت أعمل إيه

قالي أقفي هنا وهو جاي دلوقتي شوية

ولايقتلكوا مترو من غير سواق يا سلام عشنا وشفنا وأفتح باب المترو زي باب الأسناسير والكل دخل المترو

والحمد لله وصلت صالة الترانزيت

إيه الهو ده وإيه الوسع ده كله ده على كدة مطار القاهرة كان علب سلمون

قلت لفنسي أتمشي شوية وأتفرج على السوق الحرة

طبعا أنا مفكرتش نوهائياً أني أشتري حاجة لأني عارفة ومتأكدة أن الأسعار نار زي السوق الحرة اللي شوفتها في مصر

بس قلت أخد فكرة أشتري بكرة

المهم أني دلوقتي كابس على النوم الكل قالي أنام في الطيارة بس أعمل إيه بأه دماغي كانت مصفحة في الطيارة ودولقتي هنام على نفسي وأنا ماشيه مش عارفة أعمل إيه بأه

يا ربي بوفية وكافي شوب وكلام كبير أوي أحمدك يا رب أروح بأه أشرب كوباية شاي تفوقني ولا حتى كوباية نسكافية يلا إن شاء الله ماخد حوش

روحت الكوفي شوب وقلت المضيفة لو سمحت عايزة واحد نسكافية

قالت مفيش نسكافية

إيه أزاي؟؟؟؟؟؟؟؟؟؟؟ مفيش نسكافية أمال عندكوا إيه ؟؟؟؟؟؟؟؟؟؟

قالت لي في كابتشينو

ياه كابتشينو ماشي هاتي يالا كابتشينو كابتشينو وماله بس نعييش المهم

شربت الكابتشينو وعطشانة بأه عايزة أشرب مية قالت للمضيفة لو سمحتي عايزة زجاجة مية

قالت لي 10 دولار قلت أاااااااااااااه 10 دولار لية هو أحنا لاقينهم أنتي عارفة 10 دولار دول يعموا كام أنا أشرب مية ب50 جنيه ليه

قلت طيب هاتي كوباية مية

قالت لا

أعمل إيه بأه أنا عطشانة دلوقتي

جاتلي فكرة يا رب تنجح روحت لها تاني

وطلعت كرت عليه شوية روسمات فرعونية وقلت لها إيه رأيك في الكارت ده

لاقيت البنت بتاع البوفية صرخت واااااااااااااااااااااااااااااااااااو ده تحفة ده روعة ده خطير ده مريع

قالت لي ممكن اشتري منك

قلت لها أنا مش ببيع بس ممكن تاخديه هدية لاقيتها صرخت تاني

أوووووووووووووووو مبرسي

ولاقيتها من نفسها وولوحدها أتبرعت وأعطتني كوباية مية

وفضلت طول ال4 ساعات بتوع الترانزيت كل ما أعدي من أمام البوفية المضيفة تعطيني كوباية مية

فاضل ساعة على معاد الطيارة التانية يا رب أسترها معاي أنا خايفة جدا لأن أسم المطار اللي هنزل فيه في البرازيل لحد الآن لسة ما نزلش على لوحدة الأعلانات

وأنا كدة مش عارفة مكان الباب اللي هركب منه الطيارة التانية أعمل إيه دلوقيت في الورطة دي

ما أنا قلت من الأول أنا ماكنش لي سفر من أساسه

أروح أشوف حد يساعدني بأه

بقعة قهوة

بقعة قهوة

بقعة صدا

بقعة حبر

بقعة شيكولاتة

كل مشكلة ولها حل

وأدي الحل

للتخلص من بقع القهوه يمكن ازالتها باضافة قليل من النشادر لماء الغسل ثم الشطف

لازالة بقع القهوه عن الموكيت رشي عليها القليل من مرطب السفن اب فتختفي على الفور ومن ثم اشطفيها في الماء

البقع التي يسببها العرق سوف تختفي تماما اذا ما أضيف لماء الغسيل بعض مسحوق أقراص الأسبرين

ملعقة صغيرة من ماء النشادر إذا ما أضيفت إلى الماء سوف تساعد الستائر والغيارات على الاحتفاظ بلونها الأبيض الناصع وتحافظ عليها من الكرمشة عند الغسيل في الغسالة‏

لازالة بقع الصدأ من الاقمشة البيضاء تنقع الاقمشه فى اللبن الرايب او الزبادى لمدة نصف ساعه ثم تغسل فيزول الصدأ

يمكنك التخلص من بقعة الجاف والحبر بسهوله وذلك بنقع مكان البقعه فى كوب زبادى وذلك لمده قد تصل الى ثلاث ساعات ثم استخراج النسيج المراد تنظيفه من البقعه من كوب الزبادى ووضعه فى غسالة الملابس لتقوم بدورتها العاديه وسوف تفاجئين بأن البقعه قد تلاشت ولا وجود لأثر لها على الأطلاق

اذا صادفتك بقع من الصمغ لا تحتارى افركيها بماء وكحول ابيض

اذا اصفر لون القماش من المكواه نتيجه للحراره العالية قومى بغسل القماش فورا بالماء البارد والصابون وحضرى هذا المزيج المعالج امزجى نصف كوب نشادر وكمية مماثلة ملح الى نفس الكمية ماء وبعد ذلك تدعك القماشة به جيدا باستخدام قطعه قماش ثم تترك تجف

التخلص من بقع الشمع على الملابس ضعي كيسا ورقيا فوق البقعة و مرري المكواة فوقها. و سيقوم الكيس الورقي بامتصاص الشمع فتختفي البقعة تماما

تنظيف الملابس من بقع الدم انقعى الملابس طوال الليل فى ماء بارد ممزوج بالملح ثم اغسليها بالماء

لازالة البقع من الشمواه ضعى القليل من بودرة التلك ودعييها على البقعة ليلة كاملة ثم ممرى فرشاة ناشفة وكررى التجربة ان لم تفلح من المرة الاولى

لإطالة حياة الجوارب النسائية المصنوعة من النايلون، مرريها حين تكون جديدة تحت الماء البارد، وحين تجف ضعيها في البراد، وبالتالي تصبح أكثر صلابة وأطول عمراً.

لتفادي اصفرار الملابس المصنوعة من الحرير الأبيض الخالص، انقعيها في الحليب قبل غسلها، أما استعادة الألوان المشرقة للملابس الحريرية، فتتم عن طريق غسلها بالماء الممزوج بالقليل من الخل قبل غسلها بشكل عادي.

من الأخطاء الشائعة أثناء عملية الغسل وضع المسحوق على الملابس وهو لم يذب جيدًا؛ لذا يترسب قبل ذوبانه على أجزاء الملابس وقد يؤدى إلى ثقوب أو بقع.

يجب أن تجفف الفوط والملابس قبل وضعها في سلة الغسيل؛ ولذلك يفضل استعمال سلة الغسيل المصنوعة من الخيزران أو البلاستيك الذي يتخلله الهواء، وعدم ترك الملابس أيامًا عديدة في سلة الغسيل حتى لا تتغير رائحتها.

لسهولة تنظيف الملابس دون أن تتشابك القمصان و"البلوزات" أثناء غسلها في الغسالة تُربط أزرار مقدمة القميص في عروة الأكمام.

نمنع القطع الصغيرة كالثياب الداخلية، ورابطات العنق من التمزق في الغسالة بأن تُضع في غطاء وسادة وتُربط بشريط.

لتفادي سقوط أزرار الملابس لتفادي انقطاع الخيوط التي تثبت أزرار الملابس، ادهني هذه الخيوط بطبقة من الطلاء الشفاف (الورنيش) المخصص للأظافر. أو ثبتي هذه الأزرار بواسطة خيوط الحرير المخصصة لتنظيف ما بين الأسنان، التي تباع في الصيدليات، فهي خيوط ذات مقاومة عالية

تنظيف القبعات الرياضية إذا أردت تنظيف القبعات ذات الحواف الأمامية العريضة أو الكاسكيت أو الكاب، ضعيها وحدها في الغسالة واغسليها بالماء البارد أو الفاتر، وستحافظين بهذه الطريقة على الألوان بعيداً عن التسبب في اعوجاج الحافة العريضة الأمامية.

من اجل جوارب أكثر بياضاً لاستعادة الألق إلى بياض الجوارب ذات اللون الأبيض، أضيفي القليل من عصير الليمون الحامض إلى مياه الغسيل.

يمكنك إزالة آثار ملح البحر العالقة على الحذاء بمسحه بفوطة مبللة بمستحضر مصنوع من الخل والماء.

للحفاظ على الملابس من التجعد داخل حقيبة السفر، لفي كل قطعة في شكل لفافة، ولا يبقى عليك سوى فردها عند الوصول، وسترينها خالية من التجعدات

تنظيف ياقات القمصان للتخلص من البقع الصفراء التي يتركها التعرق على ياقات القمصان، حضري عجينة من الخل والكربونة، ومديها على المساحة المطلوب تنظيفها، دعيها لبعض الوقت قبل الغسيل وسترين النتيجة.

للمحافظة على اللون الأسود القاتم للملابس تغسل بماء دافئ وصابون، ثم تشطف عدة مرات مع إضافة ملعقتي نشادر إلى ماء الشطف الأخير.

طرائف مصرية مطحونة في البرازيل المجنونة1

السلام عليكم ورحمة الله وبركاته
كتير مننا ممكن يمر بظروف كتير منها الحلو ومنها اللي مش حلو
ونظرا لكثرة ضغوط الحياة فدائما بتكون اللحظات الحلوة نادرة جدا في حياتنا
علشان كدة قررت اسجل بعض اللحظات بحلوها ومرها
وسبحان الله على الرغم من إني إنسانة مسالمة جدا وفي حالي بس الظروف بأه أضطرتني أني أسافر وأسيب أهلي وصحابي
وأسافر فين أخر بلاد الدنيا............. البرازيل
وعلى الرغم من أن الأسعار في مصر كانت بدأت مرحلة الجنان المستمر اللي فيه حالياً وعلى الرغم من فواتير النور اللي دايما بتجيلي فاتورتين مع بعض مش عارفة لية وكمان على الرغم من عداد المية اللي دوخني لحد ما ركب
وكما الراجل بتاع الوصلة اللي على طول بيجي قبل معاده بأسبوع ومصر أن ده أول الشهر
إلا أني ولأول مرة أشعر بجد أني بحب البلد دي بجد والله بحبها
أصل دي أول مرة في حياتي أسافر وكمان لوحدي
يا حلاوة ربنا يستر بأه على العالم اللي بره دول ويا رب ماتهوش في ال3 قارات اللي أنا رايحة اتمشي فيهم
دخلت المطار والدموع على خدي والناس كلها بصالي وطبعا أكيد بيقولوا إيه المجنونة دي الواحد ما بيصدق أنه يسافر ودي بتعيط
معلش بأه شوية إحساس بأن مصر هتوحشني وأهلي برده هيوحشوني جدا جدا
المهم أني مشيت في المطار وأنا ماسكة جواز السفر بأيدي وخايفة جدا ليروح مني. أه ما هو ده الحاجة الوحيدة المعترف بيها بره
وصلت الجوازات وحصلت على ختم الخروج وأرتعشت يدي وأنا أسمك بجواز السفر من الظابط وهو بيقولي تروحي وترجعي بالسلامة
لأول مرة أحس أني كدة خلاص بره مصر لحد الآن الكلمة دي لسة بترن في أذني
ركبت الطيارةياااااه دي كبيرة أوي وشكلها حلو من جوة
وفضلت أقرأ قرآن أثناء إقلاع الطيارة
والحمد لله خلاص أستقرت في الجو وبدأت اتجول بيعيني في المكان وأتفرج من شباك الطيارة على الدنيا
ياااااااااااااااااااااهده السحاب تحت ده شبة القطن المنفوش يوم تنجيد العروسة شكله حلو أوي
وبعد 4 ساعات من الطيران والفرجة على السما والسحاب وحسيت أن الشمس قريبة أوي
أقتربت الطيارة من مطار الترانزيت
وبدأت مسلسل المواقف العجيبة

رسالة على ورقة بردي

السلام عليكم ورحمة الله وبركاته

ياااااااااااااااه

الدنيا اتغيرت اوي اوي

وسع يا توتي رع مش عارفة اكتب

اصل زمان على ايامنا كان ورق البردي إبداع في حد ذاته

وسبحان الله الدنيا دلوقتي اتغيرت

لا انترنيت مين ده انت قديم اوي يا توتي رع

ده دلوقتي في 3G والعالم اصبح شقة اودتين وصالة

وبما ان الناس كلها حتي بياع اللفت بأه عنده موقع على الأنترنت

بما أنها موضة بأه والكل بيعمل مدونات

قلت في عقل بالي اشمعني انتي يا نفرتيتي ولا اكمنك من زمان يعني

كان لازم وحتماً ولابد من اني اخد القرار ده

بعد تفكير عميق عميق عميق

اخيرا نفرتيتي بألها مدونة

وماله عادي يعني

اي حد ممكن يعمل مدونة

هيعقد بس 6 او 7 ساعات قدام الكمبيوتر والنت ويعمل مدونة

لكن اللي مش عادي ابدا أن نفرتيتي تعمل مدونة من بيت الزواحف

أيون من بيت الزواحف

من البرازيل

فعلا

نفرتيتي في البرازيل

مدونتي

واتمني من الله عز وجل ان تنال اعجباكوا

و أن تكون في ميزان حسناتي