قطايفاتي برازيلي

السلام عليكم ورحمة الله وبركاته

نظرا لأن هنا معنديش حاجات رمضان ولا فانوس ولا قطايف ولاكنافة ولا حتي سوادني

علشان كدة قبل رمضان ما يبدأ جبت اغنية رمضان جانا لعبد المطلب ونزلت كل اناشيد رمضان

وكمان عملت فانوس رمضان من الكرتون وعلقت زينة رمضان في البيت

وحاليا بشرب عصير خوخ على الفطار واقنع نفسي انه قمر الدين

واخيرا قلت لنفسي ازاي يبقي رمضان من غير قطايف وكنافة

وبما ان الكنافة صعبة شويتين فقلت كفاية على القطايف

والحمد لله عملت قطايفات امورات جدا جدا

وبأه عند

قطايف برازيلي

أقولكوا بأه عملتها ازاي علشان تجربوها ان شاء الله
المقادير

كوب دقيق

بيضة

ملقعة كبيرة خميرة فورية

نص ملعقة شاي سكر

ماء دافي

الطريقة

نجيب نص كوباية ماء دافي وندوب فيها السكر والخميرة وتترك لمدة ساعة حتي تتخمر تماما

بعد ما الخميرة تتخمر وتعمل رغاوي

تجيب الدقيق في اناء غويط ونعمل في وسطه حفرة ونحط البيض والخميرة

ونضرب بمضرب البيض اليدوي وطبعا نعجن بالماء الدافئ

نعجن لحد ما يكون العجين حلو كدة وبيمط يعني يكون تقريبا في لزوجة الشامبو

نسيب العجيب يتخمر اكتر وقت ممكن لأنها كل ما العجين خمرت كويس كل ما القطايف كانت احلي

انا بعمل العجين بعد صلاة الظهر وابدأ اقلي القطايف بعد التراويح

بعد ما العجين يخمر تماما نجيب طاسة وتكون تيفال وندهن الطاسة بالزيت وبالمعلقة نقلي العجين على شكل دوائر

ومهم جدا جدا تكون النار خفيفة اوي

واول لما نلاقي العجين سك نفسه وعملت دوائر كتير يبقي القطايف استوت

انا عن نفسي بعملهم واحدة واحدة علشان مش يلصقوا ببعض في الطاسة

ما الأنتهاء من العجين نبدأ حشو القطايف

نظرا لأن الفول السوداني هنا من اغلي انواع المكسرات فأنا مش بستخدمه

انا بعمل الحشو سكر وملقعة قرقة وزبيب وجوز هند

بعد ما نحشي القطايف نقليها في الزيت ونحطها في الشربات

والهنا والشفا